مع كوبايتين شاى
قاعد قدام الخيمة لقيت ام اسماعيل بتنادى عليا وام اسماعيل لمن لايعرفها ست بتاعة شاى وام لطفلين اسماعيل ومحمد
عرفتها من اعتصام 8يوليو وبرضه كانت نصبتها قدام الخيمه وقتها المهم ايوه يام اسماعيل لقيتها عماله تعيط يادى الليله
السودا هو انتى مابتبطليش عياط ابدا ياست انتى قالتلى تعالى حاضر ايه فيه ايه قالتلى مفيش تعالى اقعد هنا مع الراجل ده
بصيت لقيت راجل كبير اشيب الشعر تجاوز الستين سلامو عليكو رد الرجل بصوت هادىء لايخلو من الاسى عليكم
السلام يابنى تطلعت فى وجهه لمحت اثر الدموع قعدت جنبه ماتوحد الله ياعم الحج لا اله الا الله رد الرجل وقد انفجر فى
البكاء هدأت من روعه مالك بس قاللى مفيش سألته بس شكلك تعبان قاللى كله بيهون طب انت مريض رد الحمد لله
استفسرت منه وعرفت نوع المرض – لن اذكر تفاصيل حتى يأذن لى لانه منبه عليا-احسست ان الموضوع يسير فى
اتجاه اخر فسألته ماتعرفناش ياعم الحج قاللى محمد اسمى محمد عادل وبتشتغل ايه ياعم محمد رد انا كنت سواق تريللا
وشركتى فى البحر الاحمر بس خلاص بحكم المرض انا هنا فى البيت بالنهار وبالليل فى الميدان تعمل ايه بس وانت
عيان كده طيب استريح فى البيت قاللى بكرة كلنا نستريح فرجه قريب عندك ولاد ياعم محمد قاللى معايا سيد وبنتين
البنتين عاوزين يقعدونى فى البيت لكن انا بنزل عشان اشوف سيد تشوفه ازاى بعنى بشوفه فى وش كل واحد فى الميدان
لا حول ولا قوة الا بالله وحصل امتى الكلا م ده ياعم محمد قال خدوه منى زى ماخدوا شباب كتير نزل زى مانزل
الشباب يوم 25 يناير ويوم 28 لقيت صحابه بيقولولى تعالى خد ابنك منين ياولاد قالوا من مشرحة زينهم ------------
زينهم لله الامر من قبل ومن بعد وعملت ايه ياعم محمد قاللى معملتش طب فين تقرير الوفاة قاللى فى الشركة قولت له
وسبب الوفاة فى التقرير ولم يختلف ماقاله عم محمد عما توقعته هبوط حاد فى الدورة الدموية طب خدت حاجة –اقصد
فلوس –رد هو انا هتاجر بدم ابنى انا مش عاوز حاجة انا كنت عاوزه يسندنى اتعكز عليه وانا رايح المستشفى سألته كان
عمره اد ايه قاللى 18 سنة بعد ما كبرت وربيت وبقى راجل ياأستاذ كان لسه بيدرس بس راجل نزل عشان خاطر البلد
دى نزل عشانى وانا دلوقتى بنزل عشانه بنزل عشان اقول لكم دم سيد لسه مجاش حقه وعندى ايمان وواثق ان دمه مش
هيروح فى الارض طول مافيه ناس زيكم بتطالب بحقه وفى القصاص
طالبت عم محمد بصور من التقرير الطبى لأبنه وورق مرضه بوعدنى باحضاره ولكن طلب منى وعد مقابل بعدم عمل
اى شىء الابعد ماخد رأيه وقد وافقت
