بعد قراءتى للمدونه دى حسيت ان فيه حاجه ربكتنى ----ليه؟ اقول لكم -- اول حاجه حسيت ان امينه وصفت احساس فيا انا مش فيها وانها داست على جرح فيا بس جرح غائر ---تانى حاجه الطرف المشترك وهو احمد حراره اللى ناديت من زمااااان ان
شارع محمد محمود يتسمى بأسمه وده يكون اقل تقدير له وميوفيهوش كمان ---تالت حاجه انى اتحطيت فى موقف حسيت فيه بضأله نفسى وده يوم الوقفه التضامنيه مع سميره ابراهيم عند مجلس الدوله وسبب الموقف ده انى انسان بتحرك وحدى ومليش
اختلاط ولا حد يعرفنى ولا بتفرق معايا بس فى اليوم ده يشاء السميع العليم انى اكون لابس نضاره قريبه من بتاعة حراره وواقف وسط الناس ولقيت ستات فضليات عمالين يبصوا عليا وانا مش فاهم ضحكوا وشاوروا ونادوا حراره --حراره-- طبعا وانا ولا
هنا طلعت على السلم ووقفت سمعت واحده بتقول هو هيصور هنا مفهمتش -فهمت بعد كده ان احمد حراره كان فى المبنى وانه جه متضامن ومساند وداعم لسميره - المهم جه عليا مجموعه مكونه من بنتين وشابين وسألونى بوجه يملؤه الابتسامه هو انت اخو د-
احمد حراره قلتلهم لآ قالولى ولا تقربله فنفيت وعرفت ان وجه الشبه-بالرغم من فارق العمر- كبير بعدها جاءت سيده من اللى شاوروا عليا وسألتنى مباشره هو انت حراره لقيت الكلمه طالعه من فمى للأسف لأ اكملت معى كلمات قليله ثم استأذنت ومشيت
تضاربت مشاعرى هو انا حزين على حراره اللى فقد حبيبتيه-كما قال النبى عليه الصلاة والسلام-ولا حزين على نفسى انى مقدمتش لبلدى ماقدمه حراره هل هو نوع من الايمان والله اعلم بقلوبنا فاختار الاثبت والاقوى ايمانا ليختبره ؟ الله اعلم
لكن اللى اعرفه ان كل ماكان حد يسألنى نفس السؤال اتضائل امام نفسى ثم ازهو مفتخرا انى ممكن اقول لأى حد انا اللى شبه حراره ثم ارجع مره اخرى لأتضائل ازاى اقول كده العمليه مش بالشبه الرجوله مواقف وتضحيات وواضح انى محتاج اما لموقف
او لعمر قد عمرى عشان اثبت انى راجل زى حراره
ماعرفش ليه سألت نفسى طيب احنا ايه اللى ممكن نقدمه لأحمد وهو اللى فى كل مرة نلاقيه سابق خطاوينا ونمشى وراه ---واضح يااحمد انك انت اللى شايف واحنا مش شايفين ثابت واحنا مهزوزين فاهم واحنا ملخبطين ---ازاى يكون دكتور السنان استاذ
تربيه وطنيه ازاى يكون دكتور السنان مؤرخ وجزء من التاريخ ؟ معرفش--ومش عاوز اعرف ------------------------شكرا ياأحمد انك بتعلمنا معانى كتيره مفتقدنها بالرغم من ان الثمن غالى
